कैलालीको गोदावरी–२ मा रहेको बाह्रदेउ ज्यावन समाजका अध्यक्ष जय बहादुर धामीले संस्था सामाजिक तथा सांस्कृतिक संरक्षणमा समर्पित रहेको स्पष्ट पारेका छन्। उनले संस्थाको मूल लक्ष्य संस्कार र संस्कृतिको संरक्षण, बंशावली तयार गर्ने, तथा विभेदमुक्त समाज निर्माण गर्ने रहेको बताए। वि.सं. २०७७ मा स्थापित यस समाजमा १५ जना पदाधिकारी र ७ जना सल्लाहकार रहेको छ। अध्यक्ष धामीका अनुसार समाजले हालसम्म विभिन्न धार्मिक, सामाजिक तथा सांस्कृतिक कार्यक्रमहरू आयोजना गर्दै आएको छ। बंशावली संकलन र विभेद अन्त्यका लागि ठोस कार्ययोजना अघि बढाइएको उनले जनाए। "हाम्रो संस्कार नै हाम्रो पहिचान हो," धामी भन्छन्, "जातीय, भाषिक तथा सामाजिक विभेद अन्त्य गरी एकताको समाज निर्माणमा हामी प्रतिबद्ध छौं।" उनले सबै समुदायलाई यस अभियानमा सहभागी हुन आग्रह गरेका छन्। समाजले पछिल्लो समय विरामी, बाढीपीडित तथा अपाङ्गता भएका व्यक्तिहरूलाई समेत सहयोग पुर्याउँदै आएको उनले उल्लेख गरे। अन्त्यमा धामीले संस्थालाई थप प्रभावकारी बनाउन सबै पदाधिकारी र सल्लाहकारको सक्रियता आवश्यक रहेको बताए।